Nasanidassanasappaṭighaṁ nanasukhasahagataṁ dhammaṁ paṭicca sanidassanasappaṭigho nasukhasahagato dhammo uppajjati hetupaccayā. (Saṅkhittaṁ.) Hetuyā ekavīsa, ārammaṇe tīṇi …pe… avigate ekavīsa. Nasanidassanasappaṭighaṁ naupekkhāsahagataṁ dhammaṁ paṭicca anidassanaappaṭigho upekkhāsahagato dhammo uppajjati hetupaccayā. (Saṅkhittaṁ.) Hetuyā tīṇi …pe… avigate tīṇi. Nasanidassanasappaṭighaṁ nanaupekkhāsahagataṁ dhammaṁ paṭicca sanidassanasappaṭigho naupekkhāsahagato dhammo uppajjati hetupaccayā. (Saṅkhittaṁ.) Hetuyā ekavīsa, ārammaṇe tīṇi …pe… avigate ekavīsa. Nasanidassanasappaṭighaṁ nakāmāvacaraṁ dhammaṁ paṭicca sanidassanasappaṭigho kāmāvacaro dhammo uppajjati hetupaccayā. (Saṅkhittaṁ.) Hetuyā ekavīsa, adhipatiyā ekavīsa …pe… aññamaññe tīṇi …pe… avigate ekavīsa. Nasanidassanasappaṭighaṁ nanakāmāvacaraṁ dhammaṁ paṭicca anidassanaappaṭigho nakāmāvacaro dhammo uppajjati hetupaccayā. (Saṅkhittaṁ.) Hetuyā tīṇi …pe… avigate tīṇi.