Cetasikaṁ kusalaṁ dhammaṁ paṭicca cetasiko kusalo dhammo uppajjati hetupaccayā. Cetasikaṁ kusalaṁ dhammaṁ paṭicca acetasiko kusalo dhammo uppajjati hetupaccayā. Cetasikaṁ kusalaṁ dhammaṁ paṭicca cetasiko kusalo ca acetasiko kusalo ca dhammā uppajjanti hetupaccayā. Acetasikaṁ kusalaṁ dhammaṁ paṭicca cetasiko kusalo dhammo uppajjati hetupaccayā. Cetasikaṁ kusalañca acetasikaṁ kusalañca dhammaṁ paṭicca cetasiko kusalo dhammo uppajjati hetupaccayā. (Saṅkhittaṁ.) Hetuyā pañca, ārammaṇe pañca, adhipatiyā pañca …pe… avigate pañca. Naadhipatiyā pañca, napurejāte pañca …pe… nakamme tīṇi, navipāke pañca …pe… navippayutte pañca. (Saṅkhittaṁ, sahajātavārādi vitthāretabbo.) Cetasiko kusalo dhammo cetasikassa kusalassa dhammassa hetupaccayena paccayo. (Saṅkhittaṁ.)