Avitakkavicāramatto hetu dhammo avitakkavicāramattassa hetussa dhammassa anantarapaccayena paccayo … tīṇi. Avitakkaavicāro hetu dhammo avitakkaavicārassa hetussa dhammassa anantarapaccayena paccayo … tīṇi …pe…. Savitakkasavicāro hetu dhammo savitakkasavicārassa hetussa dhammassa upanissayapaccayena paccayo … nava. (Saṅkhittaṁ.) Hetuyā tīṇi, ārammaṇe cha, adhipatiyā pañca, anantare nava, samanantare nava, sahajāte tīṇi, aññamaññe tīṇi, nissaye tīṇi, upanissaye nava, āsevane pañca, vipāke tīṇi …pe… avigate tīṇi. Nahetuyā nava, naārammaṇe nava. (Saṅkhittaṁ.) Hetupaccayā naārammaṇe tīṇi. (Saṅkhittaṁ.) Nahetupaccayā ārammaṇe cha. (Saṅkhittaṁ.) (Yathā kusalattike pañhāvāraṁ, evaṁ vitthāretabbaṁ.) Hetu Savitakkasavicāraṁ nahetuṁ dhammaṁ paṭicca savitakkasavicāro nahetu dhammo uppajjati hetupaccayā (ekaṁ). Savitakkasavicāraṁ nahetuṁ dhammaṁ paṭicca avitakkavicāramatto nahetu dhammo uppajjati hetupaccayā (dve). Savitakkasavicāraṁ nahetuṁ dhammaṁ paṭicca avitakkaavicāro nahetu dhammo uppajjati hetupaccayā (tīṇi). Savitakkasavicāraṁ nahetuṁ dhammaṁ paṭicca savitakkasavicāro nahetu ca avitakkaavicāro nahetu ca dhammā uppajjanti hetupaccayā (cattāri).