Akusalaṁ micchattaniyataṁ dhammaṁ paṭicca akusalo micchattaniyato dhammo uppajjati hetupaccayā. (Saṅkhittaṁ.) Hetuyā ekaṁ …pe… avigate ekaṁ. (Saṅkhittaṁ. Sabbattha vitthāro.) Kusalaṁ sammattaniyataṁ dhammaṁ paṭicca kusalo sammattaniyato dhammo uppajjati hetupaccayā. (Saṅkhittaṁ.) Hetuyā ekaṁ …pe… avigate ekaṁ. (Saṅkhittaṁ. Sahajātavārepi …pe… pañhāvārepi sabbattha ekaṁ.) Kusalaṁ aniyataṁ dhammaṁ paṭicca kusalo aniyato dhammo uppajjati hetupaccayā. Kusalaṁ aniyataṁ dhammaṁ paṭicca abyākato aniyato dhammo uppajjati hetupaccayā. Kusalaṁ aniyataṁ dhammaṁ paṭicca kusalo aniyato ca abyākato aniyato ca dhammā uppajjanti hetupaccayā. Akusalaṁ aniyataṁ dhammaṁ paṭicca akusalo aniyato dhammo uppajjati hetupaccayā … tīṇi. Abyākataṁ aniyataṁ dhammaṁ paṭicca abyākato aniyato dhammo uppajjati hetupaccayā. Kusalaṁ aniyatañca abyākataṁ aniyatañca dhammaṁ paṭicca abyākato aniyato dhammo uppajjati hetupaccayā. Akusalaṁ aniyatañca abyākataṁ aniyatañca dhammaṁ paṭicca abyākato aniyato dhammo uppajjati hetupaccayā. (Saṅkhittaṁ.) Hetuyā nava, ārammaṇe tīṇi …pe… vipāke ekaṁ …pe… avigate nava. (Saṅkhittaṁ.) (Sahajātavārampi …pe… sampayuttavārampi paṭiccavārasadisaṁ.) Kusalo aniyato dhammo kusalassa aniyatassa dhammassa hetupaccayena paccayo … tīṇi.