Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena āyasmā upanando sakyaputto bhātuno saddhivihārikaṁ bhikkhuṁ etadavoca— “ehāvuso, janapadacārikaṁ pakkamissāmā”ti. “Nāhaṁ, bhante, gamissāmi; dubbalacīvaromhī”ti. “Ehāvuso, ahaṁ te cīvaraṁ dassāmī”ti tassa cīvaraṁ adāsi. Assosi kho so bhikkhu— “bhagavā kira janapadacārikaṁ pakkamissatī”ti. Atha kho tassa bhikkhuno etadahosi— “na dānāhaṁ āyasmatā upanandena sakyaputtena saddhiṁ janapadacārikaṁ pakkamissāmi, bhagavatā saddhiṁ janapadacārikaṁ pakkamissāmī”ti. Atha kho āyasmā upanando sakyaputto taṁ bhikkhuṁ etadavoca— “ehi dāni, āvuso, janapadacārikaṁ pakkamissāmā”ti. “Nāhaṁ, bhante, tayā saddhiṁ janapadacārikaṁ pakkamissāmi, bhagavatā saddhiṁ janapadacārikaṁ pakkamissāmī”ti. “Yampi tyāhaṁ, āvuso, cīvaraṁ adāsiṁ, mayā saddhiṁ janapadacārikaṁ pakkamissatī”ti, kupito anattamano acchindi. Atha kho so bhikkhu bhikkhūnaṁ etamatthaṁ ārocesi. Ye te bhikkhū appicchā …pe… te ujjhāyanti khiyyanti vipācenti— “kathañhi nāma āyasmā upanando sakyaputto bhikkhussa sāmaṁ cīvaraṁ datvā kupito anattamano acchindissatī”ti.