Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū pādukāruḷhassa dhammaṁ desenti …pe…. “Na pādukāruḷhassa agilānassa dhammaṁ desessāmīti sikkhā karaṇīyā”ti. Na pādukāruḷhassa agilānassa dhammo desetabbo. Yo anādariyaṁ paṭicca akkantassa vā paṭimukkassa vā omukkassa vā agilānassa dhammaṁ deseti, āpatti dukkaṭassa. Anāpatti— asañcicca …pe… ādikammikassāti. Paṭhamasikkhāpadaṁ niṭṭhitaṁ. Theravāda Vinaya

62. Upāhanāruḷhasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū upāhanāruḷhassa dhammaṁ desenti …pe…. “Na upāhanāruḷhassa agilānassa dhammaṁ desessāmīti sikkhā karaṇīyā”ti. Na upāhanāruḷhassa agilānassa dhammo desetabbo. Yo anādariyaṁ paṭicca akkantassa vā paṭimukkassa vā omukkassa vā agilānassa dhammaṁ deseti, āpatti dukkaṭassa. Anāpatti— asañcicca …pe… ādikammikassāti. Dutiyasikkhāpadaṁ niṭṭhitaṁ. Theravāda Vinaya

63. Yānasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū yānagatassa dhammaṁ desenti …pe…. “Na yānagatassa agilānassa dhammaṁ desessāmīti sikkhā karaṇīyā”ti.