Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū mahāhasitaṁ hasantā antaraghare gacchanti …pe…. “Na ujjagghikāya antaraghare gamissāmīti sikkhā karaṇīyā”ti. Na ujjagghikāya antaraghare gantabbaṁ. Yo anādariyaṁ paṭicca mahāhasitaṁ hasanto antaraghare gacchati, āpatti dukkaṭassa. Anāpatti— asañcicca, assatiyā, ajānantassa, gilānassa, hasanīyasmiṁ vatthusmiṁ mihitamattaṁ karoti, āpadāsu, ummattakassa, ādikammikassāti. Paṭhamasikkhāpadaṁ niṭṭhitaṁ. Theravāda Vinaya

12. Dutiyaujjagghikasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū mahāhasitaṁ hasantā antaraghare nisīdanti …pe…. “Na ujjagghikāya antaraghare nisīdissāmīti sikkhā karaṇīyā”ti. Na ujjagghikāya antaraghare nisīditabbaṁ. Yo anādariyaṁ paṭicca mahāhasitaṁ hasanto antaraghare nisīdati, āpatti dukkaṭassa. Anāpatti— asañcicca, assatiyā, ajānantassa, gilānassa, hasanīyasmiṁ vatthusmiṁ mihitamattaṁ karoti, āpadāsu, ummattakassa, ādikammikassāti. Dutiyasikkhāpadaṁ niṭṭhitaṁ. Theravāda Vinaya

13. Uccasaddasikkhāpada