Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū uccāsaddaṁ mahāsaddaṁ karontā antaraghare gacchanti …pe…. “Appasaddo antaraghare gamissāmīti sikkhā karaṇīyā”ti. Appasaddena antaraghare gantabbaṁ. Yo anādariyaṁ paṭicca uccāsaddaṁ mahāsaddaṁ karonto antaraghare gacchati, āpatti dukkaṭassa. Anāpatti— asañcicca, assatiyā, ajānantassa, gilānassa, āpadāsu, ummattakassa, ādikammikassāti. Tatiyasikkhāpadaṁ niṭṭhitaṁ. Theravāda Vinaya

14. Dutiyauccasaddasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū uccāsaddaṁ mahāsaddaṁ karontā antaraghare nisīdanti …pe…. “Appasaddo antaraghare nisīdissāmīti sikkhā karaṇīyā”ti. Appasaddena antaraghare nisīditabbaṁ. Yo anādariyaṁ paṭicca uccāsaddaṁ mahāsaddaṁ karonto antaraghare nisīdati, āpatti dukkaṭassa. Anāpatti— asañcicca …pe… ādikammikassāti. Catutthasikkhāpadaṁ niṭṭhitaṁ. Theravāda Vinaya

15. Kāyappacālakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū kāyappacālakaṁ antaraghare gacchanti kāyaṁ olambentā …pe…. “Na kāyappacālakaṁ antaraghare gamissāmīti sikkhā karaṇīyā”ti.