Ye te bhikkhū appicchā …pe… te ujjhāyanti khiyyanti vipācenti— “kathañhi nāma chabbaggiyā bhikkhū dhammikānaṁ kammānaṁ chandaṁ datvā pacchā khīyanadhammaṁ āpajjissantī”ti …pe… “saccaṁ kira tumhe, bhikkhave, dhammikānaṁ kammānaṁ chandaṁ datvā pacchā khīyanadhammaṁ āpajjathā”ti? “Saccaṁ, bhagavā”ti. Vigarahi buddho bhagavā …pe… kathañhi nāma tumhe, moghapurisā, dhammikānaṁ kammānaṁ chandaṁ datvā pacchā khīyanadhammaṁ āpajjissatha. Netaṁ, moghapurisā, appasannānaṁ vā pasādāya …pe… evañca pana, bhikkhave, imaṁ sikkhāpadaṁ uddiseyyātha— “Yo pana bhikkhu dhammikānaṁ kammānaṁ chandaṁ datvā pacchā khīyanadhammaṁ āpajjeyya, pācittiyan”ti. Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Dhammikaṁ nāma kammaṁ apalokanakammaṁ ñattikammaṁ ñattidutiyakammaṁ ñatticatutthakammaṁ dhammena vinayena satthusāsanena kataṁ, etaṁ dhammikaṁ nāma kammaṁ. Chandaṁ datvā khiyyati āpatti pācittiyassa. Dhammakamme dhammakammasaññī chandaṁ datvā khiyyati, āpatti pācittiyassa. Dhammakamme vematiko chandaṁ datvā khiyyati, āpatti dukkaṭassa. Dhammakamme adhammakammasaññī chandaṁ datvā khiyyati, anāpatti. Adhammakamme dhammakammasaññī, āpatti dukkaṭassa. Adhammakamme vematiko, āpatti dukkaṭassa. Adhammakamme adhammakammasaññī, anāpatti. Anāpatti— “adhammena vā vaggena vā na kammārahassa vā kammaṁ katan”ti jānanto khiyyati, ummattakassa, ādikammikassāti. Kammapaṭibāhanasikkhāpadaṁ niṭṭhitaṁ navamaṁ. Theravāda Vinaya

80. Chandaṁadatvāgamanasikkhāpada