Senā nāma hatthī assā rathā pattī. Dvādasapuriso hatthī, tipuriso asso, catupuriso ratho, cattāro purisā sarahatthā patti. Dassanāya gacchati, āpatti dukkaṭassa. Yattha ṭhito passati, āpatti pācittiyassa. Dassanūpacāraṁ vijahitvā punappunaṁ passati, āpatti pācittiyassa. Aññatra tathārūpappaccayāti ṭhapetvā tathārūpappaccayaṁ. Uyyutte uyyuttasaññī dassanāya gacchati, aññatra tathārūpappaccayā, āpatti pācittiyassa. Uyyutte vematiko dassanāya gacchati, aññatra tathārūpappaccayā, āpatti pācittiyassa. Uyyutte anuyyuttasaññī dassanāya gacchati, aññatra tathārūpappaccayā, āpatti pācittiyassa. Ekamekaṁ dassanāya gacchati, āpatti dukkaṭassa. Yattha ṭhito passati, āpatti dukkaṭassa. Dassanūpacāraṁ vijahitvā punappunaṁ passati, āpatti dukkaṭassa. Anuyyutte uyyuttasaññī, āpatti dukkaṭassa. Anuyyutte vematiko, āpatti dukkaṭassa. Anuyyutte anuyyuttasaññī, anāpatti. Anāpatti— ārāme ṭhito passati, bhikkhussa ṭhitokāsaṁ vā nisinnokāsaṁ vā nipannokāsaṁ vā āgacchati, paṭipathaṁ gacchanto passati, tathārūpappaccayā, āpadāsu, ummattakassa, ādikammikassāti. Uyyuttasenāsikkhāpadaṁ niṭṭhitaṁ aṭṭhamaṁ. Theravāda Vinaya

49. Senāvāsasikkhāpada