“Na avagaṇḍakārakaṁ bhuñjissāmīti sikkhā karaṇīyā”ti. Na avagaṇḍakārakaṁ bhuñjitabbaṁ. Yo anādariyaṁ paṭicca ekato vā ubhato vā gaṇḍaṁ katvā bhuñjati, āpatti dukkaṭassa. Anāpatti— asañcicca, assatiyā, ajānantassa, gilānassa, phalāphale, āpadāsu, ummattakassa, ādikammikassāti. Chaṭṭhasikkhāpadaṁ niṭṭhitaṁ. Theravāda Vinaya

47. Hatthaniddhunakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū hatthaniddhunakaṁ bhuñjanti …pe…. “Na hatthaniddhunakaṁ bhuñjissāmīti sikkhā karaṇīyā”ti. Na hatthaniddhunakaṁ bhuñjitabbaṁ. Yo anādariyaṁ paṭicca hatthaniddhunakaṁ bhuñjati, āpatti dukkaṭassa. Anāpatti— asañcicca, assatiyā, ajānantassa, gilānassa, kacavaraṁ chaḍḍento hatthaṁ niddhunāti, āpadāsu, ummattakassa, ādikammikassāti. Sattamasikkhāpadaṁ niṭṭhitaṁ. Theravāda Vinaya

48. Sitthāvakārakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sitthāvakārakaṁ bhuñjanti …pe… “Na sitthāvakārakaṁ bhuñjissāmīti sikkhā karaṇīyā”ti. Na sitthāvakārakaṁ bhuñjitabbaṁ. Yo anādariyaṁ paṭicca sitthāvakārakaṁ bhuñjati, āpatti dukkaṭassa.