Tena samayena buddho bhagavā vesāliyaṁ viharati mahāvane kūṭāgārasālāyaṁ. Tena kho pana samayena saṅghassa khādanīyaṁ ussannaṁ hoti. Atha kho āyasmā ānando bhagavato etamatthaṁ ārocesi. “Tenahānanda, vighāsādānaṁ pūvaṁ dehī”ti. “Evaṁ, bhante”ti kho āyasmā ānando bhagavato paṭissuṇitvā vighāsāde paṭipāṭiyā nisīdāpetvā ekekaṁ pūvaṁ dento aññatarissā paribbājikāya ekaṁ maññamāno dve pūve adāsi. Sāmantā paribbājikāyo taṁ paribbājikaṁ etadavocuṁ—“jāro te eso samaṇo”ti. “Na me so samaṇo jāro, ekaṁ maññamāno dve pūve adāsī”ti. Dutiyampi kho …pe… tatiyampi kho āyasmā ānando ekekaṁ pūvaṁ dento tassāyeva paribbājikāya ekaṁ maññamāno dve pūve adāsi. Sāmantā paribbājikāyo taṁ paribbājikaṁ etadavocuṁ—“jāro te eso samaṇo”ti. “Na me so samaṇo jāro, ekaṁ maññamāno dve pūve adāsī”ti. “Jāro na jāro”ti bhaṇḍiṁsu. Aññataropi ājīvako parivesanaṁ agamāsi. Aññataro bhikkhu pahūtena sappinā odanaṁ madditvā tassa ājīvakassa mahantaṁ piṇḍaṁ adāsi. Atha kho so ājīvako taṁ piṇḍaṁ ādāya agamāsi. Aññataro ājīvako taṁ ājīvakaṁ etadavoca—“kuto