Na hatthanillehakaṁ bhuñjitabbaṁ. Yo anādariyaṁ paṭicca hatthanillehakaṁ bhuñjati, āpatti dukkaṭassa. Anāpatti— asañcicca …pe… ādikammikassāti. Dutiyasikkhāpadaṁ niṭṭhitaṁ. Theravāda Vinaya

53. Pattanillehakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū pattanillehakaṁ bhuñjanti …pe… “Na pattanillehakaṁ bhuñjissāmīti sikkhā karaṇīyā”ti. Na pattanillehakaṁ bhuñjitabbaṁ. Yo anādariyaṁ paṭicca pattanillehakaṁ bhuñjati, āpatti dukkaṭassa. Anāpatti— asañcicca, assatiyā, ajānantassa, gilānassa, parittake sese ekato saṅkaḍḍhitvā nillehitvā bhuñjati, āpadāsu, ummattakassa, ādikammikassāti. Tatiyasikkhāpadaṁ niṭṭhitaṁ. Theravāda Vinaya

54. Oṭṭhanillehakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū oṭṭhanillehakaṁ bhuñjanti …pe… “Na oṭṭhanillehakaṁ bhuñjissāmīti sikkhā karaṇīyā”ti. Na oṭṭhanillehakaṁ bhuñjitabbaṁ. Yo anādariyaṁ paṭicca oṭṭhanillehakaṁ bhuñjati, āpatti dukkaṭassa. Anāpatti— asañcicca …pe… ādikammikassāti. Catutthasikkhāpadaṁ niṭṭhitaṁ. Theravāda Vinaya

55. Sāmisasikkhāpada