Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena aññataro bhikkhu kosalesu janapade sāvatthiṁ gacchanto aññatarena gāmadvārena atikkamati. Aññatarā itthī sāmikena saha bhaṇḍitvā gāmato nikkhamitvā taṁ bhikkhuṁ passitvā etadavoca— “kahaṁ, bhante, ayyo gamissatī”ti? “Sāvatthiṁ kho ahaṁ, bhagini, gamissāmī”ti. “Ahaṁ ayyena saddhiṁ gamissāmī”ti. “Eyyāsi, bhaginī”ti. Atha kho tassā itthiyā sāmiko gāmato nikkhamitvā manusse pucchi— “apāyyo, evarūpiṁ itthiṁ passeyyāthā”ti? “Esāyyo, pabbajitena saha gacchatī”ti. Atha kho so puriso anubandhitvā taṁ bhikkhuṁ gahetvā ākoṭetvā muñci. Atha kho so bhikkhu aññatarasmiṁ rukkhamūle padhūpento nisīdi. Atha kho sā itthī taṁ purisaṁ etadavoca— “nāyyo, so bhikkhu maṁ nippātesi; api ca ahameva tena bhikkhunā saddhiṁ gacchāmi; akārako so bhikkhu; gaccha, naṁ khamāpehī”ti. Atha kho so puriso taṁ bhikkhuṁ khamāpesi.