Aññatra samayā viññāpeti, payoge dukkaṭaṁ. Paṭilābhena nissaggiyaṁ hoti. Nissajjitabbaṁ saṅghassa vā gaṇassa vā puggalassa vā. Evañca pana, bhikkhave, nissajjitabbaṁ. …pe… idaṁ me, bhante, cīvaraṁ aññātakaṁ gahapatikaṁ, aññatra samayā viññāpitaṁ, nissaggiyaṁ. Imāhaṁ saṅghassa nissajjāmīti …pe… dadeyyāti …pe… dadeyyunti …pe… āyasmato dammīti. Aññātake aññātakasaññī aññatra samayā cīvaraṁ viññāpeti, nissaggiyaṁ pācittiyaṁ. Aññātake vematiko aññatra samayā cīvaraṁ viññāpeti, nissaggiyaṁ pācittiyaṁ. Aññātake ñātakasaññī aññatra samayā cīvaraṁ viññāpeti, nissaggiyaṁ pācittiyaṁ. Ñātake aññātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti. Anāpatti— samaye, ñātakānaṁ, pavāritānaṁ, aññassatthāya, attano dhanena, ummattakassa, ādikammikassāti. Aññātakaviññattisikkhāpadaṁ niṭṭhitaṁ chaṭṭhaṁ. Theravāda Vinaya

7. Tatuttarisikkhāpada