Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū tahaṁ tahaṁ olokentā piṇḍapātaṁ bhuñjanti, ākirantepi atikkantepi na jānanti …pe…. “Pattasaññī piṇḍapātaṁ bhuñjissāmīti sikkhā karaṇīyā”ti. Pattasaññinā piṇḍapāto bhuñjitabbo. Yo anādariyaṁ paṭicca tahaṁ tahaṁ olokento piṇḍapātaṁ bhuñjati, āpatti dukkaṭassa. Anāpatti— asañcicca …pe… ādikammikassāti. Dutiyasikkhāpadaṁ niṭṭhitaṁ. Theravāda Vinaya

33. Sapadānasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū tahaṁ tahaṁ omasitvā piṇḍapātaṁ bhuñjanti …pe…. “Sapadānaṁ piṇḍapātaṁ bhuñjissāmīti sikkhā karaṇīyā”ti. Sapadānaṁ piṇḍapāto bhuñjitabbo. Yo anādariyaṁ paṭicca tahaṁ tahaṁ omasitvā piṇḍapātaṁ bhuñjati, āpatti dukkaṭassa. Anāpatti— asañcicca, assatiyā, ajānantassa, gilānassa, aññesaṁ dento omasati, aññassa bhājane ākiranto omasati, uttaribhaṅge, āpadāsu, ummattakassa, ādikammikassāti. Tatiyasikkhāpadaṁ niṭṭhitaṁ. Theravāda Vinaya

34. Samasūpakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū piṇḍapātaṁ bhuñjantā sūpaññeva bahuṁ bhuñjanti …pe…. “Samasūpakaṁ piṇḍapātaṁ bhuñjissāmīti sikkhā karaṇīyā”ti. Sūpo nāma dve sūpā— muggasūpo, māsasūpo hatthahāriyo. Samasūpako piṇḍapāto bhuñjitabbo. Yo anādariyaṁ paṭicca sūpaññeva bahuṁ bhuñjati, āpatti dukkaṭassa.