Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū bāhuppacālakaṁ antaraghare nisīdanti bāhuṁ olambentā …pe…. “Na bāhuppacālakaṁ antaraghare nisīdissāmīti sikkhā karaṇīyā”ti. Na bāhuppacālakaṁ antaraghare nisīditabbaṁ. Bāhuṁ paggahetvā nisīditabbaṁ. Yo anādariyaṁ paṭicca bāhuppacālakaṁ antaraghare nisīdati bāhuṁ olambento, āpatti dukkaṭassa. Anāpatti— asañcicca, assatiyā, ajānantassa, gilānassa, vāsūpagatassa, āpadāsu, ummattakassa, ādikammikassāti. Aṭṭhamasikkhāpadaṁ niṭṭhitaṁ. Theravāda Vinaya

19. Sīsappacālakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sīsappacālakaṁ antaraghare gacchanti sīsaṁ olambentā …pe…. “Na sīsappacālakaṁ antaraghare gamissāmīti sikkhā karaṇīyā”ti. Na sīsappacālakaṁ antaraghare gantabbaṁ. Sīsaṁ paggahetvā gantabbaṁ. Yo anādariyaṁ paṭicca sīsappacālakaṁ antaraghare gacchati sīsaṁ olambento, āpatti dukkaṭassa. Anāpatti— asañcicca …pe… ādikammikassāti. Navamasikkhāpadaṁ niṭṭhitaṁ. Theravāda Vinaya

20. Dutiyasīsappacālakasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sīsappacālakaṁ antaraghare nisīdanti sīsaṁ olambentā …pe…. “Na sīsappacālakaṁ antaraghare nisīdissāmīti sikkhā karaṇīyā”ti.