Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū anāhaṭe kabaḷe mukhadvāraṁ vivaranti …pe…. “Na anāhaṭe kabaḷe mukhadvāraṁ vivarissāmīti sikkhā karaṇīyā”ti. Na anāhaṭe kabaḷe mukhadvāraṁ vivaritabbaṁ. Yo anādariyaṁ paṭicca anāhaṭe kabaḷe mukhadvāraṁ vivarati, āpatti dukkaṭassa. Anāpatti— asañcicca …pe… ādikammikassāti. Paṭhamasikkhāpadaṁ niṭṭhitaṁ. Theravāda Vinaya

42. Dutiyaanāhaṭasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū bhuñjamānā sabbaṁ hatthaṁ mukhe pakkhipanti …pe…. “Na bhuñjamāno sabbaṁ hatthaṁ mukhe pakkhipissāmīti sikkhā karaṇīyā”ti. Na bhuñjamānena sabbo hattho mukhe pakkhipitabbo. Yo anādariyaṁ paṭicca bhuñjamāno sabbaṁ hatthaṁ mukhe pakkhipati, āpatti dukkaṭassa. Anāpatti— asañcicca …pe… ādikammikassāti. Dutiyasikkhāpadaṁ niṭṭhitaṁ. Theravāda Vinaya

43. Sakabaḷasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sakabaḷena mukhena byāharanti …pe…. “Na sakabaḷena mukhena byāharissāmīti sikkhā karaṇīyā”ti.