Na ukkuṭikāya antaraghare gantabbaṁ. Yo anādariyaṁ paṭicca ukkuṭikāya antaraghare gacchati, āpatti dukkaṭassa. Anāpatti— asañcicca …pe… ādikammikassāti. Pañcamasikkhāpadaṁ niṭṭhitaṁ. Theravāda Vinaya

26. Pallatthikasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū pallatthikāya antaraghare nisīdanti …pe…. “Na pallatthikāya antaraghare nisīdissāmīti sikkhā karaṇīyā”ti. Na pallatthikāya antaraghare nisīditabbaṁ. Yo anādariyaṁ paṭicca hatthapallatthikāya vā dussapallatthikāya vā antaraghare nisīdati, āpatti dukkaṭassa. Anāpatti— asañcicca, assatiyā, ajānantassa, gilānassa, vāsūpagatassa, āpadāsu, ummattakassa, ādikammikassāti. Chaṭṭhasikkhāpadaṁ niṭṭhitaṁ. Theravāda Vinaya

27. Sakkaccapaṭiggahaṇasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū asakkaccaṁ piṇḍapātaṁ paṭiggaṇhanti chaḍḍetukāmā viya …pe…. “Sakkaccaṁ piṇḍapātaṁ paṭiggahessāmīti sikkhā karaṇīyā”ti. Sakkaccaṁ piṇḍapāto paṭiggahetabbo. Yo anādariyaṁ paṭicca asakkaccaṁ piṇḍapātaṁ paṭiggaṇhāti chaḍḍetukāmo viya, āpatti dukkaṭassa.