Na khambhakatena antaraghare nisīditabbaṁ. Yo anādariyaṁ paṭicca ekato vā ubhato vā khambhaṁ katvā antaraghare nisīdati, āpatti dukkaṭassa. Anāpatti— asañcicca, assatiyā, ajānantassa, gilānassa, vāsūpagatassa, āpadāsu, ummattakassa, ādikammikassāti. Dutiyasikkhāpadaṁ niṭṭhitaṁ. Theravāda Vinaya

23. Oguṇṭhitasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sasīsaṁ pārupitvā antaraghare gacchanti …pe…. “Na oguṇṭhito antaraghare gamissāmīti sikkhā karaṇīyā”ti. Na oguṇṭhitena antaraghare gantabbaṁ. Yo anādariyaṁ paṭicca sasīsaṁ pārupitvā antaraghare gacchati, āpatti dukkaṭassa. Anāpatti— asañcicca …pe… ādikammikassāti. Tatiyasikkhāpadaṁ niṭṭhitaṁ. Theravāda Vinaya

24. Dutiyaoguṇṭhitasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sasīsaṁ pārupitvā antaraghare nisīdanti …pe…. “Na oguṇṭhito antaraghare nisīdissāmīti sikkhā karaṇīyā”ti. Na oguṇṭhitena antaraghare nisīditabbaṁ. Yo anādariyaṁ paṭicca sasīsaṁ pārupitvā antaraghare nisīdati, āpatti dukkaṭassa. Anāpatti— asañcicca, assatiyā, ajānantassa, gilānassa, vāsūpagatassa, āpadāsu, ummattakassa, ādikammikassāti. Catutthasikkhāpadaṁ niṭṭhitaṁ. Theravāda Vinaya

25. Ukkuṭikasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū ukkuṭikāya antaraghare gacchanti …pe…. “Na ukkuṭikāya antaraghare gamissāmīti sikkhā karaṇīyā”ti.