Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū acchinnacīvarake bhikkhū upasaṅkamitvā evaṁ vadanti— “bhagavatā, āvuso, anuññātaṁ— ‘acchinnacīvarassa vā naṭṭhacīvarassa vā aññātakaṁ gahapatiṁ vā gahapatāniṁ vā cīvaraṁ viññāpetuṁ’; viññāpetha, āvuso, cīvaran”ti. “Alaṁ, āvuso, laddhaṁ amhehi cīvaran”ti. “Mayaṁ āyasmantānaṁ viññāpemā”ti. “Viññāpetha, āvuso”ti. Atha kho chabbaggiyā bhikkhū gahapatike upasaṅkamitvā etadavocuṁ— “acchinnacīvarakā, āvuso, bhikkhū āgatā. Detha nesaṁ cīvarānī”ti, bahuṁ cīvaraṁ viññāpesuṁ.