Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū hatthampi pādampi kīḷāpentā antaraghare nisīdanti …pe…. “Susaṁvuto antaraghare nisīdissāmīti sikkhā karaṇīyā”ti. Susaṁvutena antaraghare nisīditabbaṁ. Yo anādariyaṁ paṭicca hatthaṁ vā pādaṁ vā kīḷāpento antaraghare nisīdati, āpatti dukkaṭassa. Anāpatti— asañcicca, assatiyā, ajānantassa, gilānassa, ummattakassa, ādikammikassāti. Chaṭṭhasikkhāpadaṁ niṭṭhitaṁ. Theravāda Vinaya

7. Okkhittacakkhusikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū tahaṁ tahaṁ olokentā antaraghare gacchanti …pe…. “Okkhittacakkhu antaraghare gamissāmīti sikkhā karaṇīyā”ti. Okkhittacakkhunā antaraghare gantabbaṁ yugamattaṁ pekkhantena. Yo anādariyaṁ paṭicca tahaṁ tahaṁ olokento antaraghare gacchati, āpatti dukkaṭassa. Anāpatti— asañcicca, assatiyā, ajānantassa, gilānassa, āpadāsu, ummattakassa, ādikammikassāti. Sattamasikkhāpadaṁ niṭṭhitaṁ. Theravāda Vinaya

8. Dutiyaokkhittacakkhusikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū tahaṁ tahaṁ olokentā antaraghare nisīdanti …pe…. “Okkhittacakkhu antaraghare nisīdissāmīti sikkhā karaṇīyā”ti. Okkhittacakkhunā antaraghare nisīditabbaṁ yugamattaṁ pekkhantena. Yo anādariyaṁ paṭicca tahaṁ tahaṁ olokento antaraghare nisīdati, āpatti dukkaṭassa.