“Suppaṭicchanno antaraghare gamissāmīti sikkhā karaṇīyā”ti. Suppaṭicchannena antaraghare gantabbaṁ. Yo anādariyaṁ paṭicca kāyaṁ vivaritvā antaraghare gacchati, āpatti dukkaṭassa. Anāpatti— asañcicca, assatiyā, ajānantassa, gilānassa, āpadāsu, ummattakassa, ādikammikassāti. Tatiyasikkhāpadaṁ niṭṭhitaṁ. Theravāda Vinaya

4. Dutiyasuppaṭicchannasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū kāyaṁ vivaritvā antaraghare nisīdanti …pe…. “Suppaṭicchanno antaraghare nisīdissāmīti sikkhā karaṇīyā”ti. Suppaṭicchannena antaraghare nisīditabbaṁ. Yo anādariyaṁ paṭicca kāyaṁ vivaritvā antaraghare nisīdati, āpatti dukkaṭassa. Anāpatti— asañcicca, assatiyā, ajānantassa, gilānassa, vāsūpagatassa, āpadāsu, ummattakassa, ādikammikassāti. Catutthasikkhāpadaṁ niṭṭhitaṁ. Theravāda Vinaya

5. Susaṁvutasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū hatthampi pādampi kīḷāpentā antaraghare gacchanti …pe…. “Susaṁvuto antaraghare gamissāmīti sikkhā karaṇīyā”ti. Susaṁvutena antaraghare gantabbaṁ. Yo anādariyaṁ paṭicca hatthaṁ vā pādaṁ vā kīḷāpento antaraghare gacchati, āpatti dukkaṭassa. Anāpatti— asañcicca, assatiyā, ajānantassa, gilānassa, ummattakassa, ādikammikassāti. Pañcamasikkhāpadaṁ niṭṭhitaṁ. Theravāda Vinaya

6. Dutiyasusaṁvutasikkhāpada