Na uppathena gacchantena pathena gacchantassa agilānassa dhammo desetabbo. Yo anādariyaṁ paṭicca uppathena gacchanto pathena gacchantassa agilānassa dhammaṁ deseti, āpatti dukkaṭassa. Anāpatti— asañcicca …pe… ādikammikassāti. Dvādasamasikkhāpadaṁ niṭṭhitaṁ. Theravāda Vinaya

73. Ṭhitouccārasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū ṭhitā uccārampi passāvampi karonti …pe…. “Na ṭhito agilāno uccāraṁ vā passāvaṁ vā karissāmīti sikkhā karaṇīyā”ti. Na ṭhitena agilānena uccāro vā passāvo vā kātabbo. Yo anādariyaṁ paṭicca ṭhito agilāno uccāraṁ vā passāvaṁ vā karoti, āpatti dukkaṭassa. Anāpatti— asañcicca …pe… ādikammikassāti. Terasamasikkhāpadaṁ niṭṭhitaṁ. Theravāda Vinaya

74. Hariteuccārasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū harite uccārampi passāvampi kheḷampi karonti …pe…. “Na harite agilāno uccāraṁ vā passāvaṁ vā kheḷaṁ vā karissāmīti sikkhā karaṇīyā”ti. Na harite agilānena uccāro vā passāvo vā kheḷo vā kātabbo. Yo anādariyaṁ paṭicca harite agilāno uccāraṁ vā passāvaṁ vā kheḷaṁ vā karoti, āpatti dukkaṭassa.