Tena kho pana samayena bhikkhū mahānāmaṁ sakkaṁ parittaṁyeva bhesajjaṁ viññāpenti. Tatheva mahānāmassa sakkassa bhesajjaṁ ussannaṁ hoti. Tatiyampi kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahānāmo sakko bhagavantaṁ etadavoca— “icchāmahaṁ, bhante, saṅghaṁ yāvajīvaṁ bhesajjena pavāretun”ti. “Sādhu sādhu, mahānāma. Tena hi tvaṁ, mahānāma, saṅghaṁ yāvajīvaṁ bhesajjena pavārehī”ti. Bhikkhū kukkuccāyantā nādhivāsenti. Bhagavato etamatthaṁ ārocesuṁ …pe… anujānāmi, bhikkhave, niccapavāraṇampi sāditun”ti.