Yo panāti yo yādiso …pe… bhikkhūti …pe… ayaṁ imasmiṁ atthe adhippeto bhikkhūti. Saṅghiko nāma vihāro saṅghassa dinno hoti pariccatto. Jānāti nāma vuḍḍhoti jānāti, gilānoti jānāti, saṅghena dinnoti jānāti. Anupakhajjāti anupavisitvā. Seyyaṁ kappeyyāti mañcassa vā pīṭhassa vā pavisantassa vā nikkhamantassa vā upacāre seyyaṁ santharati vā santharāpeti vā, āpatti dukkaṭassa. Abhinisīdati vā abhinipajjati vā, āpatti pācittiyassa. Etadeva paccayaṁ karitvā anaññanti na añño koci paccayo hoti anupakhajja seyyaṁ kappetuṁ. Saṅghike saṅghikasaññī anupakhajja seyyaṁ kappeti, āpatti pācittiyassa. Saṅghike vematiko anupakhajja seyyaṁ kappeti, āpatti pācittiyassa. Saṅghike puggalikasaññī anupakhajja seyyaṁ kappeti, āpatti pācittiyassa.