“Uṭṭhehi cora kiṁ sesi, ko attho supanena te; Mā taṁ gahesuṁ rājāno, gāme kibbisakārakaṁ”. “Yannu coraṁ gahessanti, gāme kibbisakārakaṁ; Kiṁ tattha pucimandassa, vane jātassa tiṭṭhato”. “Na tvaṁ assattha jānāsi, mama corassa cantaraṁ; Coraṁ gahetvā rājāno, gāme kibbisakārakaṁ; Appenti nimbasūlasmiṁ, tasmiṁ me saṅkate mano”. “Saṅkeyya saṅkitabbāni, rakkheyyānāgataṁ bhayaṁ; Anāgatabhayā dhīro, ubho loke avekkhatī”ti. Pucimandajātakaṁ paṭhamaṁ. Catukkanipāta Pucimandavagga

2. Kassapamandiyajātaka

“Api kassapa mandiyā, yuvā sapati hanti vā; Sabbaṁ taṁ khamate dhīro, paṇḍito taṁ titikkhati. Sacepi santo vivadanti, khippaṁ sandhīyare puna; Bālā pattāva bhijjanti, na te samathamajjhagū. Ete bhiyyo samāyanti, sandhi tesaṁ na jīrati; Yo cādhipannaṁ jānāti, yo ca jānāti desanaṁ.