Esasmākaṁ kule dhammo, pitupitāmaho sadā; Sakkaccaṁ upatiṭṭhāma, uttamaṁ viya ñātakan”ti. Pīṭhajātakaṁ sattamaṁ. Catukkanipāta Kokilavagga

8. Thusajātaka

“Viditaṁ thusaṁ undurānaṁ, Viditaṁ pana taṇḍulaṁ; Thusaṁ thusaṁ vivajjetvā, Taṇḍulaṁ pana khādare. Yā mantanā araññasmiṁ, yā ca gāme nikaṇṇikā; Yañcetaṁ iti cīti ca, etampi viditaṁ mayā. Dhammena kira jātassa, pitā puttassa makkaṭo; Daharasseva santassa, dantehi phalamacchidā. Yametaṁ parisappasi, ajakāṇova sāsape; Yopāyaṁ heṭṭhato seti, etampi viditaṁ mayā”ti. Thusajātakaṁ aṭṭhamaṁ. Catukkanipāta Kokilavagga

9. Bāverujātaka

“Adassanena morassa, sikhino mañjubhāṇino; Kākaṁ tattha apūjesuṁ, maṁsena ca phalena ca.