“Pañca paṇḍitā mayaṁ bhaddante, Sabbe pañjalikā upaṭṭhitā; Tvaṁ no abhibhuyya issarosi, Sakkova bhūtapati devarājā; Etampi disvāna ahaṁ vadāmi, Pañño nihīno sirīmāva seyyo”. “Dāsova paññassa yasassi bālo, Atthesu jātesu tathāvidhesu; Yaṁ paṇḍito nipuṇaṁ saṁvidheti, Sammohamāpajjati tattha bālo; Etampi disvāna ahaṁ vadāmi, Paññova seyyo na yasassi bālo. Addhā hi paññāva sataṁ pasatthā, Kantā sirī bhogaratā manussā; Ñāṇañca buddhānamatulyarūpaṁ, Paññaṁ na acceti sirī kadāci”.