“Muñcathetaṁ mahānāgaṁ, yoyaṁ bharati mātaraṁ; Sametu mātarā nāgo, saha sabbehi ñātibhi”. “Mutto ca bandhanā nāgo, muttamādāya kuñjaro; Muhuttaṁ assāsayitvā, agamā yena pabbato. Tato so naḷiniṁ gantvā, sītaṁ kuñjarasevitaṁ; Soṇḍāyūdakamāhatvā, mātaraṁ abhisiñcatha”. “Koyaṁ anariyo devo, akālenapi vassati; Gato me atrajo putto, yo mayhaṁ paricārako”. “Uṭṭhehi amma kiṁ sesi, āgato tyāhamatrajo; Muttomhi kāsirājena, vedehena yasassinā”. “Ciraṁ jīvatu so rājā, kāsīnaṁ raṭṭhavaḍḍhano; Yo me puttaṁ pamocesi, sadā vuddhāpacāyikan”ti. Mātuposakajātakaṁ paṭhamaṁ. Ekādasakanipāta Mātuposakavagga

2. Juṇhajātaka

“Suṇohi mayhaṁ vacanaṁ janinda, Atthena juṇhamhi idhānupatto; Na brāhmaṇe addhike tiṭṭhamāne, Gantabbamāhu dvipadindaseṭṭha”.