“Jeṭṭho atha majjhimo kaniṭṭho, Yo ce sīlasamāhito ṭhitatto; Nindiyamatthaṁ pasaṁsiyaṁ vā, Bhātu vāvīkareyya guyhamatthaṁ”. “Yo ve pituhadayassa paddhagū, Anujāto pitaraṁ anomapañño; Nindiyamatthaṁ pasaṁsiyaṁ vā, Puttassāvikareyya guyhamatthaṁ”. “Mātā dvipadājanindaseṭṭha, Yā naṁ poseti chandasā piyena; Nindiyamatthaṁ pasaṁsiyaṁ vā, Mātuyāvīkareyya guyhamatthaṁ”. “Guyhassa hi guyhameva sādhu, Na hi guyhassa pasatthamāvikammaṁ; Anipphannatā saheyya dhīro, Nipphannova yathāsukhaṁ bhaṇeyya”. “Kiṁ tvaṁ vimanosi rājaseṭṭha, Dvipadajaninda vacanaṁ suṇoma metaṁ; Kiṁ cintayamāno dummanosi, Nūna deva aparādho atthi mayhaṁ”.