“Etasmiṁ te sulapite, patirūpe subhāsite; Varaṁ kassapa te dammi, yaṁ kiñci manasicchasi”. “Varañce me ado sakka, sabbabhūtānamissara; Tato ratyā vivasāne, sūriyuggamanaṁ pati; Dibbā bhakkhā pātubhaveyyuṁ, sīlavanto ca yācakā. Dadato me na khīyetha, datvā nānutapeyyahaṁ; Dadaṁ cittaṁ pasādeyyaṁ, etaṁ sakka varaṁ vare”. “Etasmiṁ te sulapite, patirūpe subhāsite; Varaṁ kassapa te dammi, yaṁ kiñci manasicchasi”. “Varañce me ado sakka, sabbabhūtānamissara; Na maṁ puna upeyyāsi, etaṁ sakka varaṁ vare”. “Bahūhi vatacariyāhi, narā ca atha nāriyo; Dassanaṁ abhikaṅkhanti, kiṁ nu me dassane bhayaṁ”. “Taṁ tādisaṁ devavaṇṇaṁ, sabbakāmasamiddhinaṁ; Disvā tapo pamajjeyyaṁ, etaṁ te dassane bhayan”ti. Akittijātakaṁ sattamaṁ. Terasakanipāta Ambavagga

8. Takkāriyajātaka