Yo ca uppatitaṁ atthaṁ, na khippamanubujjhati; Amittavasamanveti, pacchā ca anutappati. Yo ca uppatitaṁ atthaṁ, khippameva nibodhati; Muccate sattusambādhā, na ca pacchānutappatī”ti. Vānarajātakaṁ dutiyaṁ. Catukkanipāta Cūḷakuṇālavagga

3. Kuntinījātaka

“Avasimha tavāgāre, niccaṁ sakkatapūjitā; Tvameva dānimakari, handa rāja vajāmahaṁ”. “Yo ve kate paṭikate, kibbise paṭikibbise; Evaṁ taṁ sammatī veraṁ, vasa kuntini māgamā”. “Na katassa ca kattā ca, metti sandhīyate puna; Hadayaṁ nānujānāti, gacchaññeva rathesabha”. “Katassa ceva kattā ca, metti sandhīyate puna; Dhīrānaṁ no ca bālānaṁ, vasa kuntini māgamā”ti. Kuntinījātakaṁ tatiyaṁ. Catukkanipāta Cūḷakuṇālavagga

4. Ambajātaka

“Yo nīliyaṁ maṇḍayati, saṇḍāsena vihaññati; Tassa sā vasamanvetu, yā te ambe avāhari”.