Samā gopanisādehi, tepi vuccanti brāhmaṇā; Akkhātā te mahārāja, tādise nipatāmase”. “Apetā te ca brahmaññā, (iti rājā korabyo) Na te vuccanti brāhmaṇā; Aññe vidhura pariyesa, Sīlavante bahussute. Virate methunā dhammā, ye me bhuñjeyyu bhojanaṁ; Dakkhiṇaṁ samma dassāma, yattha dinnaṁ mahapphalaṁ”. “Araññe kuṭikaṁ katvā, kūṭāni kārayanti te; Sasabiḷāre bādhenti, āgodhā macchakacchapaṁ. Te luddakasamā rāja, tepi vuccanti brāhmaṇā; Akkhātā te mahārāja, tādise nipatāmase”. “Apetā te ca brahmaññā, (iti rājā korabyo) Na te vuccanti brāhmaṇā; Aññe vidhura pariyesa, Sīlavante bahussute. Virate methunā dhammā, ye me bhuñjeyyu bhojanaṁ; Dakkhiṇaṁ samma dassāma, yattha dinnaṁ mahapphalaṁ”. “Aññe dhanassa kāmā hi, heṭṭhāmañce pasakkitā; Rājāno upari nhāyanti, somayāge upaṭṭhite. Malamajjakasamā rāja, Tepi vuccanti brāhmaṇā; Akkhātā te mahārāja, Tādise nipatāmase”.