“Pāpāni kammāni karetha rāja, Bahussuto ce na careyya dhammaṁ; Sahassavedopi na taṁ paṭicca, Dukkhā pamucce caraṇaṁ apatvā”. “Sahassavedopi na taṁ paṭicca, Dukkhā pamucce caraṇaṁ apatvā; Maññāmi vedā aphalā bhavanti, Sasaṁyamaṁ caraṇaññeva saccaṁ”. “Na heva vedā aphalā bhavanti, Sasaṁyamaṁ caraṇaññeva saccaṁ; Kittiñhi pappoti adhicca vede, Santiṁ puṇāti caraṇena danto”. “Bhaccā mātā pitā bandhū, yena jāto sayeva so; Uddālako ahaṁ bhoto, sottiyākulavaṁsako”. “Kathaṁ bho brāhmaṇo hoti, kathaṁ bhavati kevalī; Kathañca parinibbānaṁ, dhammaṭṭho kinti vuccati”. “Niraṅkatvā aggimādāya brāhmaṇo, Āpo siñcaṁ yajaṁ usseti yūpaṁ; Evaṅkaro brāhmaṇo hoti khemī, Dhamme ṭhitaṁ tena amāpayiṁsu”.