“Tuvañca eko bhariyā ca te piyā, Samuggapakkhittanikiṇṇamantare; Sā rakkhitā kucchigatāva te sadā, Vāyussa puttena sahā tahiṁ ratā”. “Saṁviggarūpo isinā viyākato, So dānavo tattha samuggamuggili; Addakkhi bhariyaṁ suci māladhāriniṁ, Vāyussa puttena sahā tahiṁ rataṁ”. “Sudiṭṭharūpamuggatapānuvattinā, Hīnā narā ye pamadāvasaṁ gatā; Yathā have pāṇarivettha rakkhitā, Duṭṭhā mayī aññamabhippamodayi. Divā ca ratto ca mayā upaṭṭhitā, Tapassinā jotirivā vane vasaṁ; Sā dhammamukkamma adhammamācari, Akiriyarūpo pamadāhi santhavo. Sarīramajjhamhi ṭhitātimaññahaṁ, Mayhaṁ ayanti asatiṁ asaññataṁ; Sā dhammamukkamma adhammamācari, Akiriyarūpo pamadāhi santhavo.