“Dadaṁ bhuñja mā ca pamādo, Cakkaṁ vattaya kosalādhipa; Mā rāja adhammiko ahu, Dhammaṁ pālaya kosalādhipa”. “Sohaṁ tadeva punappunaṁ, Vaṭumaṁ ācarissāmi sobhane; Ariyācaritaṁ sukosale, Arahanto me manāpāva passituṁ. Devī viya accharūpamā, Majjhe nārigaṇassa sobhasi; Kiṁ kammamakāsi bhaddakaṁ, Kenāsi vaṇṇavatī sukosale”. “Ambaṭṭhakulassa khattiya, Dāsyāhaṁ parapesiyā ahuṁ; Saññatā ca dhammajīvinī, Sīlavatī ca apāpadassanā. Uddhaṭabhattaṁ ahaṁ tadā, Caramānassa adāsi bhikkhuno; Vittā sumanā sayaṁ ahaṁ, Tassa kammassa phalaṁ mamedisan”ti. Kummāsapiṇḍijātakaṁ dasamaṁ. Sattakanipāta Gandhāravagga

11. Parantapajātaka