“Yo mātaraṁ vā pitaraṁ saviṭṭha, Adūsake hiṁsati pāpadhammo; Kāyassa bhedā abhisamparāyaṁ, Asaṁsayaṁ so nirayaṁ upeti. Yo mātaraṁ vā pitaraṁ saviṭṭha, Annena pānena upaṭṭhahāti; Kāyassa bhedā abhisamparāyaṁ, Asaṁsayaṁ so sugatiṁ upeti. Na me tvaṁ putta ahitānukampī, Hitānukampī me tvaṁsi putta; Ahañca taṁ mātarā vuccamāno, Etādisaṁ kamma karomi luddaṁ”. “Yā te sā bhariyā anariyarūpā, Mātā mamesā sakiyā janetti; Niddhāpaye tañca sakā agārā, Aññampi te sā dukhamāvaheyya. Yā te sā bhariyā anariyarūpā, Mātā mamesā sakiyā janetti; Dantā kareṇūva vasūpanītā, Sā pāpadhammā punarāvajātū”ti. Takkalajātakaṁ aṭṭhamaṁ. Dasakanipāta Catudvāravagga

9. Mahādhammapālajātaka