Evameva yo dukkulīno anariyo, Tammāka vijjañca sutañca ādiya; Tameva so tattha sutena khādati, Anariyo vuccati dupāhanūpamo”ti. Upāhanajātakaṁ paṭhamaṁ. Dukanipāta Upāhanavagga

2. Vīṇāguṇajātaka

“Ekacintito yamattho, bālo apariṇāyako; Na hi khujjena vāmena, bhoti saṅgantumarahasi”. “Purisūsabhaṁ maññamānā, ahaṁ khujjamakāmayiṁ; Soyaṁ saṅkuṭito seti, chinnatanti yathā viṇā”ti. Vīṇāguṇajātakaṁ dutiyaṁ. Dukanipāta Upāhanavagga

3. Vikaṇṇajātaka

“Kāmaṁ yahiṁ icchasi tena gaccha, Viddhosi mammamhi vikaṇṇakena; Hatosi bhattena suvāditena, Lolo ca macche anubandhamāno”.