Guṇehi etehi upeta khattiya, Ṭhitamariyavattī suvaco akodhano; Sukhī anuppīḷa pasāsamediniṁ, Ito vimuttopi ca yāhi suggatiṁ. Evaṁ sunītena subhāsitena, Dhammena ñāyena upāyaso nayaṁ; Nibbāpaye saṅkhubhitaṁ mahājanaṁ, Mahāva megho salilena medinin”ti. Sumaṅgalajātakaṁ catutthaṁ. Aṭṭhakanipāta Kaccānivagga

5. Gaṅgamālajātaka

“Aṅgārajātā pathavī, kukkuḷānugatā mahī; Atha gāyasi vattāni, na taṁ tapati ātapo. Uddhaṁ tapati ādicco, adho tapati vālukā; Atha gāyasi vattāni, na taṁ tapati ātapo”. “Na maṁ tapati ātapo, ātapā tapayanti maṁ; Atthā hi vividhā rāja, te tapanti na ātapo”. “Addasaṁ kāma te mūlaṁ, saṅkappā kāma jāyasi; Na taṁ saṅkappayissāmi, evaṁ kāma na hehisi”. “Appāpi kāmā na alaṁ, bahūhipi na tappati; Ahahā bālalapanā, parivajjetha jaggato”.