“Sobhati maccho gaṅgeyyo, atho sobhati yāmuno; Catuppadoyaṁ puriso, nigrodhaparimaṇḍalo; Īsakāyatagīvo ca, sabbeva atirocati”. “Yaṁ pucchito na taṁ akkhāsi, Aññaṁ akkhāsi pucchito; Attappasaṁsako poso, Nāyaṁ asmāka ruccatī”ti. Gaṅgeyyajātakaṁ pañcamaṁ. Dukanipāta Nataṁdaḷhavagga

6. Kuruṅgamigajātaka

“Iṅgha vaṭṭamayaṁ pāsaṁ, chinda dantehi kacchapa; Ahaṁ tathā karissāmi, yathā nehiti luddako”. “Kacchapo pāvisī vāriṁ, kuruṅgo pāvisī vanaṁ; Satapatto dumaggamhā, dūre putte apānayī”ti. Kuruṅgamigajātakaṁ chaṭṭhaṁ. Dukanipāta Nataṁdaḷhavagga

7. Assakajātaka

“Ayamassakarājena, deso vicarito mayā; Anukāmayakāmena, piyena patinā saha. Navena sukhadukkhena, porāṇaṁ apidhīyati; Tasmā assakaraññāva, kīṭo piyataro mamā”ti. Assakajātakaṁ sattamaṁ. Dukanipāta Nataṁdaḷhavagga

8. Susumārajātaka