“Natthi anto kuto anto, na anto paṭidissati; Tadā hi pakataṁ pāpaṁ, mama tuyhañca mārisā”. “Sohaṁ nūna ito gantvā, yoniṁ laddhāna mānusiṁ; Vadaññū sīlasampanno, kāhāmi kusalaṁ bahun”ti. Lohakumbhijātakaṁ catutthaṁ. Catukkanipāta Pucimandavagga

5. Sabbamaṁsalābhajātaka

“Pharusā vata te vācā, maṁsaṁ yācanako asi; Kilomasadisī vācā, kilomaṁ samma dammi te”. “Aṅgametaṁ manussānaṁ, bhātā loke pavuccati; Aṅgassa sadisī vācā, aṅgaṁ samma dadāmi te”. “Tātāti putto vadamāno, kampeti hadayaṁ pitu; Hadayassa sadisī vācā, hadayaṁ samma dammi te”. “Yassa gāme sakhā natthi, yathāraññaṁ tatheva taṁ; Sabbassa sadisī vācā, sabbaṁ samma dadāmi te”ti. Sabbamaṁsalābhajātakaṁ pañcamaṁ. Catukkanipāta Pucimandavagga

6. Sasapaṇḍitajātaka

“Satta me rohitā macchā, udakā thalamubbhatā; Idaṁ brāhmaṇa me atthi, etaṁ bhutvā vane vasa”.