“Bhadrako vatāyaṁ māṇavako, Sabbalokavidū muni; Yo imaṁ taṇhaṁ dukkhajananiṁ, Parijānāti paṇḍito”ti. Kāmajātakaṁ catutthaṁ. Dvādasakanipāta Cūḷakuṇālavagga

5. Janasandhajātaka

“Dasa khalu imāni ṭhānāni, Yāni pubbe akaritvā; Sa pacchā manutappati, Iccevāha janasandho. Aladdhā vittaṁ tappati, pubbe asamudānitaṁ; Na pubbe dhanamesissaṁ, iti pacchānutappati. Sakyarūpaṁ pure santaṁ, mayā sippaṁ na sikkhitaṁ; Kicchā vutti asippassa, iti pacchānutappati. Kūṭavedī pure āsiṁ, pisuṇo piṭṭhimaṁsiko; Caṇḍo ca pharuso cāpi, iti pacchānutappati. Pāṇātipātī pure āsiṁ, luddo cāpi anāriyo; Bhūtānaṁ nāpacāyissaṁ, iti pacchānutappati. Bahūsu vata santīsu, anāpādāsu itthisu; Paradāraṁ asevissaṁ, iti pacchānutappati. Bahumhi vata santamhi, annapāne upaṭṭhite; Na pubbe adadaṁ dānaṁ, iti pacchānutappati.