“Acchera rūpaṁ vata yādisañca, Dukkhitaṁ maṁ dukkhāpayase sudhamme; Yācassu puttaṁ iti vuccamānā, Bhiyyova ussāhayase kumāraṁ”. “Ye vippamuttā anavajjabhogino, Parinibbutā lokamimaṁ caranti; Tamariyamaggaṁ paṭipajjamānaṁ, Na ussahe vārayituṁ kumāraṁ”. “Addhā have sevitabbā sapaññā, Bahussutā ye bahuṭhānacintino; Yesāyaṁ sutvāna subhāsitāni, Appossukkā vītasokā sudhammā”ti. Somanassajātakaṁ navamaṁ. Vīsatinipāta Mātaṅgavagga

10. Campeyyajātaka

“Kā nu vijjurivābhāsi, Osadhī viya tārakā; Devatā nusi gandhabbī, Na taṁ maññāmi mānusiṁ”. “Namhi devī na gandhabbī, na mahārāja mānusī; Nāgakaññāsmi bhaddante, atthenamhi idhāgatā”.