Yattha cakkhāyatanaṁ uppajjati tattha sotāyatanaṁ uppajjatīti? Āmantā. Yattha vā pana sotāyatanaṁ uppajjati tattha cakkhāyatanaṁ uppajjatīti? Āmantā. Yattha cakkhāyatanaṁ uppajjati tattha ghānāyatanaṁ uppajjatīti? Rūpāvacare tattha cakkhāyatanaṁ uppajjati, no ca tattha ghānāyatanaṁ uppajjati. Kāmāvacare tattha cakkhāyatanañca uppajjati ghānāyatanañca uppajjati. Yattha vā pana ghānāyatanaṁ uppajjati tattha cakkhāyatanaṁ uppajjatīti? Āmantā. Yattha cakkhāyatanaṁ uppajjati tattha rūpāyatanaṁ uppajjatīti? Āmantā. Yattha vā pana rūpāyatanaṁ uppajjati tattha cakkhāyatanaṁ uppajjatīti? Asaññasatte tattha rūpāyatanaṁ uppajjati, no ca tattha cakkhāyatanaṁ uppajjati. Pañcavokāre tattha rūpāyatanañca uppajjati cakkhāyatanañca uppajjati. Yattha cakkhāyatanaṁ uppajjati tattha manāyatanaṁ uppajjatīti? Āmantā. Yattha vā pana manāyatanaṁ uppajjati tattha cakkhāyatanaṁ uppajjatīti? Arūpe tattha manāyatanaṁ uppajjati, no ca tattha cakkhāyatanaṁ uppajjati. Pañcavokāre tattha manāyatanañca uppajjati cakkhāyatanañca uppajjati. Yattha cakkhāyatanaṁ uppajjati tattha dhammāyatanaṁ uppajjatīti? Āmantā.