Yassa vā pana yattha bhavarāgānusayo anuseti tassa tattha kāmarāgānusayo ca paṭighānusayo ca mānānusayo ca anusentīti? Catunnaṁ puggalānaṁ rūpadhātuyā arūpadhātuyā tesaṁ tattha bhavarāgānusayo ca mānānusayo ca anusenti, no ca tesaṁ tattha kāmarāgānusayo ca paṭighānusayo ca anusenti. Yassa yattha kāmarāgānusayo ca paṭighānusayo ca mānānusayo ca anusenti tassa tattha avijjānusayo anusetīti? Natthi. Yassa vā pana yattha avijjānusayo anuseti tassa tattha kāmarāgānusayo ca paṭighānusayo ca mānānusayo ca anusentīti?