Yassa vā pana dhammāyatanaṁ nirujjhissati tassa ghānāyatanaṁ uppajjissatīti? Pacchimabhavikānaṁ upapajjantānaṁ ye ca rūpāvacaraṁ arūpāvacaraṁ upapajjitvā parinibbāyissanti tesaṁ dhammāyatanaṁ nirujjhissati, no ca tesaṁ ghānāyatanaṁ uppajjissati. Itaresaṁ tesaṁ dhammāyatanañca nirujjhissati ghānāyatanañca uppajjissati. Yassa rūpāyatanaṁ uppajjissati tassa manāyatanaṁ …pe… dhammāyatanaṁ nirujjhissatīti? Āmantā. Yassa vā pana dhammāyatanaṁ nirujjhissati tassa rūpāyatanaṁ uppajjissatīti? Pacchimabhavikānaṁ upapajjantānaṁ ye ca arūpaṁ upapajjitvā parinibbāyissanti tesaṁ dhammāyatanaṁ nirujjhissati, no ca tesaṁ rūpāyatanaṁ uppajjissati. Itaresaṁ tesaṁ dhammāyatanañca nirujjhissati rūpāyatanañca uppajjissati. Yassa manāyatanaṁ uppajjissati tassa dhammāyatanaṁ nirujjhissatīti? Āmantā. Yassa vā pana dhammāyatanaṁ nirujjhissati tassa manāyatanaṁ uppajjissatīti? Pacchimabhavikānaṁ upapajjantānaṁ tesaṁ dhammāyatanaṁ nirujjhissati, no ca tesaṁ manāyatanaṁ uppajjissati. Itaresaṁ tesaṁ dhammāyatanañca nirujjhissati manāyatanañca uppajjissati. 3.2.3.3.2. Anulomaokāsa Yattha cakkhāyatanaṁ uppajjissati …pe…. 3.2.3.3.3. Anulomapuggalokāsa Yassa yattha cakkhāyatanaṁ uppajjissati tassa tattha sotāyatanaṁ nirujjhissatīti? Āmantā. Yassa vā pana yattha sotāyatanaṁ nirujjhissati tassa tattha cakkhāyatanaṁ uppajjissatīti?