Yattha vā pana maggasaccaṁ uppajjati tattha dukkhasaccaṁ uppajjatīti? Āmantā. Yattha samudayasaccaṁ uppajjati tattha maggasaccaṁ uppajjatīti? Apāye tattha samudayasaccaṁ uppajjati, no ca tattha maggasaccaṁ uppajjati. Avasese catuvokāre pañcavokāre tattha samudayasaccañca uppajjati maggasaccañca uppajjati. Yattha vā pana …pe… ? Āmantā. 5.2.1.1.3. Anulomapuggalokāsa Yassa yattha dukkhasaccaṁ uppajjati tassa tattha samudayasaccaṁ uppajjatīti? …pe…. (Yassakampi yassayatthakampi sadisaṁ vitthāretabbaṁ.) 5.2.1.1.4. Paccanīkapuggala Yassa dukkhasaccaṁ nuppajjati tassa samudayasaccaṁ nuppajjatīti? Āmantā. Yassa vā pana samudayasaccaṁ nuppajjati tassa dukkhasaccaṁ nuppajjatīti? Sabbesaṁ upapajjantānaṁ pavatte taṇhāvippayuttacittassa uppādakkhaṇe tesaṁ samudayasaccaṁ nuppajjati, no ca tesaṁ dukkhasaccaṁ nuppajjati. Sabbesaṁ cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ samudayasaccañca nuppajjati dukkhasaccañca nuppajjati. Yassa dukkhasaccaṁ nuppajjati tassa maggasaccaṁ nuppajjatīti? Arūpe maggassa uppādakkhaṇe tesaṁ dukkhasaccaṁ nuppajjati, no ca tesaṁ maggasaccaṁ nuppajjati. Sabbesaṁ cavantānaṁ pavatte cittassa bhaṅgakkhaṇe arūpe phalassa uppādakkhaṇe tesaṁ dukkhasaccañca nuppajjati maggasaccañca nuppajjati.