Yassa vā pana saññākkhandho na nirujjhissati tassa vedanākkhandho nuppajjitthāti? Uppajjittha. 2.2.3.6.5. Paccanīkaokāsa Yattha rūpakkhandho nuppajjittha …pe…. 2.2.3.6.6. Paccanīkapuggalokāsa Yassa yattha rūpakkhandho nuppajjittha tassa tattha vedanākkhandho na nirujjhissatīti? Suddhāvāsaṁ upapajjantānaṁ arūpānaṁ tesaṁ tattha rūpakkhandho nuppajjittha, no ca tesaṁ tattha vedanākkhandho na nirujjhissati. Suddhāvāse parinibbantānaṁ arūpe parinibbantānaṁ tesaṁ tattha rūpakkhandho ca nuppajjittha vedanākkhandho ca na nirujjhissati. Yassa vā pana yattha vedanākkhandho na nirujjhissati tassa tattha rūpakkhandho nuppajjitthāti? Pañcavokāre parinibbantānaṁ asaññasattānaṁ tesaṁ tattha vedanākkhandho na nirujjhissati, no ca tesaṁ tattha rūpakkhandho nuppajjittha. Suddhāvāse parinibbantānaṁ arūpe parinibbantānaṁ tesaṁ tattha vedanākkhandho ca na nirujjhissati rūpakkhandho ca nuppajjittha. Yassa yattha vedanākkhandho nuppajjittha tassa tattha saññākkhandho na nirujjhissatīti? Suddhāvāsaṁ upapajjantānaṁ tesaṁ tattha vedanākkhandho nuppajjittha, no ca tesaṁ tattha saññākkhandho na nirujjhissati. Suddhāvāse parinibbantānaṁ asaññasattānaṁ tesaṁ tattha vedanākkhandho ca nuppajjittha saññākkhandho ca na nirujjhissati. Yassa vā pana yattha saññākkhandho na nirujjhissati tassa tattha vedanākkhandho nuppajjitthāti?