Yassa vā pana yattha sotāyatanaṁ nuppajjittha tassa tattha cakkhāyatanaṁ nuppajjatīti? Suddhāvāsaṁ upapajjantānaṁ tesaṁ tattha sotāyatanaṁ nuppajjittha, no ca tesaṁ tattha cakkhāyatanaṁ nuppajjati. Suddhāvāse parinibbantānaṁ asaññasattānaṁ arūpānaṁ tesaṁ tattha sotāyatanañca nuppajjittha cakkhāyatanañca nuppajjati. Yassa yattha cakkhāyatanaṁ nuppajjati tassa tattha ghānāyatanaṁ nuppajjitthāti? Kāmāvacarā cavantānaṁ acakkhukānaṁ kāmāvacaraṁ upapajjantānaṁ tesaṁ tattha cakkhāyatanaṁ nuppajjati, no ca tesaṁ tattha ghānāyatanaṁ nuppajjittha. Rūpāvacarā cavantānaṁ asaññasattānaṁ arūpānaṁ tesaṁ tattha cakkhāyatanañca nuppajjati ghānāyatanañca nuppajjittha. Yassa vā pana yattha ghānāyatanaṁ nuppajjittha tassa tattha cakkhāyatanaṁ nuppajjatīti? Rūpāvacaraṁ upapajjantānaṁ tesaṁ tattha ghānāyatanaṁ nuppajjittha, no ca tesaṁ tattha cakkhāyatanaṁ nuppajjati. Rūpāvacarā cavantānaṁ asaññasattānaṁ arūpānaṁ tesaṁ tattha ghānāyatanañca nuppajjittha cakkhāyatanañca nuppajjati. Yassa yattha cakkhāyatanaṁ nuppajjati tassa tattha rūpāyatanaṁ nuppajjitthāti? Pañcavokārā cavantānaṁ acakkhukānaṁ kāmāvacaraṁ upapajjantānaṁ asaññasattānaṁ tesaṁ tattha cakkhāyatanaṁ nuppajjati, no ca tesaṁ tattha rūpāyatanaṁ nuppajjittha. Suddhāvāse parinibbantānaṁ arūpānaṁ tesaṁ tattha cakkhāyatanañca nuppajjati rūpāyatanañca nuppajjittha.